Sexualitatea eta esklerosi anizkoitza

Esklerosi Anizkoitza duten pertsonek sexualitateaz gozatzeko desira, eskubidea eta gaitasuna dute.

Esklerosi Anizkoitza duten pertsonen erdiek / bi heren inguruk gaixotasunarekin lotutako sexu-nahasmenduak dituzte. Hala eta guztiz ere, ez da beti osasun-arretan lantzen: sexualitatea ez da aipatzen, ez da ebaluatzen, eta ez da tratatzen.

Sexualitatea pertsonen arteko oinarrizko beharra da

«Batzuetan, jatorriari eta tratamenduari buruzko ezjakintasunagatik gertatzen da hori; beste batzuetan, berriz, lotsagatik edo pazientea gaizki ulertzeagatik, edo kontsultetan lehentasunezko elementua ez dela uste izateagatik», ziurtatu du Jose Bustamante psikologo klinikoak, sexologian adituak.

Sexualitatea «segurtasuna eta estimua bezain pertsonarteko oinarrizko behar garrantzitsua da. Atxikimendu bihurtzen da, adiskidetasuna garatzen duen gizarte-harremanen sare; edo afektuarekin eta sexualitatearekin lotutako gorputz-kontaktu eta -intimitate», gogorarazi du adituak. Eta funtsezkoa da garapenerako eta ongizate emozionalerako. Izan ere, bizi-kalitateari eragiten dio, katalizatzaile emozional indartsua da, eta huts egiten duenean, harremana zalantzan jartzen du. Eta, batez ere, «giza eskubide aitortua da».

Esklerosi Anizkoitzak eragindako sexu-disfuntzioak

Esklerosi Anizkoitza duten biztanleek sexu-arazoren bat izateko probabilitate handiagoa dute. Esklerosi Anizkoitzarekin zuzenean lotutako disfuntzio sexualen artean, hauek nabarmentzen dira:

• Disfuntzio primarioak: desira galtzea, genitalen zentzumen-murrizketa eta sexu-erantzuneko, kitzikapeneko eta orgasmoko zailtasunak.
• Disfuntzio sekundarioak: maskuriaren edo hestearen inkontinentzia, nekea, espastikotasuna, giharretako ahultasuna, dardara, arretarik edo kontzentraziorik eza, alterazio sentsorialak eta mugikortasun murriztua.
• Disfuntzio tertziarioak: gai emozionalei eragiten diete, hala nola, autoestimu baxuari, desgaitasuna onartzeko zailtasunari, egotzitako rol sexualarekiko disonantziari edo sexualitateari buruzko mito eta uste faltsuei.

Sexu-eredua

Jose Bustamantek gogorarazi du sexualitate eredu asko daudela eta «ez dela saiatu behar, zurea, inposatutako ereduan sartzen, gizarte gisa daukaguna zalantzan jartzen baizik». Adituak mito ezberdinak desmuntatzen ditu.

• Masturbazioa ez da kontsolazio hutsa bikotekiderik ez izateagatik. «Adierazteko eta gozatzeko modu indibiduala izan daiteke, zure burua ezagutzeko eta nahi duzunean ahalduntzeko modua».
• Koitoa
  • Ez da sexualitatearen adierazpen gorena. Premisa horrek «koito-harremanik ez duten pertsona guztiak kanporatzen ditu».
  • Ez du espontaneoa izan behar gozatzeko. Esklerosi Anizkoitza bezalako gaixotasunak dituzten pertsonen kasuan, «sexu-topaketa errazagoa izango da planifikatzen bada, betebehar gisa ezarri gabe, baizik eta horretarako testuinguru bat sortuz, gorputza harkorrago dagoen eguneko unera egokituz».
  • Ez dago gorputz gazte eta osasuntsuentzat bakarrik gordeta.

Oztopoak gainditu

Jose Bustamantek gogorarazi du beharrezkoa dela behar fisiko bereziak dituzten pertsonen errealitatea ikusaraztea, «beren sexualitateaz gozatzeko desira, eskubidea eta gaitasuna dutelako». «Edonola ere, dugun zailtasuna dugula, denok dugu azala, eta, beraz, mapa erogeno bat esploratzeko».

Informazio gehiago: josebustamante.org

Webminarra: Sexualitatea eta Esklerosi Anizkoitza: https://www.youtube.com/watch?v=EOsxsb4Vojg